52歲生日沾旺氣 祥仔豪言：同毛毛分億元獎金

黎耀祥、毛舜筠昨日如常在電視城拍《愛•回家之八時入席》，適逢祥仔52歲生日，劇組為他慶生，祥仔老婆Julia專程探班並送上壽包，非常恩愛。

黎耀祥不介意生日開工，有內地粉絲更送上印有祥仔肖像的五磅蛋糕，他覺得獲粉絲愛戴，非常窩心。問他有何生日願望，祥仔說希望身體健康、香港經濟轉好，大家都開開心心，並表示：「老婆送咗生日卡，阿仔就送咗個化粧袋，印咗一家三口個樣喺個袋，佢想我勤力賺錢放落袋。」

戲份多冇得休息

一億元六合彩今晚攪珠，問他會否趁生日碰碰運氣，祥仔笑言：「中獎嘅話，我會分一半畀毛舜筠。但我冇呢啲命，我係辛苦命。（中頭獎咪唔使拍劇？）咁又唔得，我要將我嘅歡樂帶畀人，中咗就更加開心去拍劇。」

至於毛毛亦自問沒有中獎命，她自嘲道：「畀我中獎簡直天方夜譚。」她又謂就算中獎都不會劈炮唔撈，因為初段戲份集中在她身上，「我妒忌男主角一星期有兩、三日休息，唔抵得，唔公平。」

撰文：Pauline

編輯：陳禮恒

設計：梁政敏