KFC推「秘製」指甲油 fb票選兩款炸雞滋味

唔知各位姊妹有無試過，幫指甲扮完靚後，食嘢時特別顧忌，驚食咗落肚。原來，真係有食得落肚嘅指甲油㗎！話說噚日KFC舉辦活動，話要推出「點指回味」彩甲油系列，兩款限量版彩甲油，分別係家鄉雞同香辣脆雞味道，聽講指甲油真係用KFC秘製配方研製出嚟，加上用咗全天然材料，聽到都想試。

公關仲話，推出指甲油，係要打破味覺同視覺界綫，發揮品牌精髓「It's finger lickin' good」。想試下係咪真係咁好味？今個星期要留意KFC香港Facebook專頁，參加投票揀選你最想試嘅味道，聽講出口味未來幾個月會限量推出市場，讓大家一齊回味！