【聲明】港生活網站並無進行電話推廣活動

富豪御廚放完假 Harlan7月進擊中環!

發佈時間: 2016/05/03

去中環食飯,遇上有「富豪名人御廚」之稱嘅Harlan Goldstein,記得前幾年Harlan決心keep fit,請健身教練陪他舉重、跑步、練kickboxing,加埋自製健康餐單,五個半月減咗55磅,今次再見番佢,似乎有少少肥咗。Harlan笑一笑,話自己真係肥番啲,皆因佢啱啱放完九個月大假,休息之餘沉澱一下,放假期間用咗六個星期周遊列國,古巴、墨西哥、紐約、芝加哥等等,品嘗美食兼尋找靈感,原來係「心廣體胖」,聽到都令人羨慕!

放完假又有咩大計?Harlan話,好開心同ZS Hospitality合作,成為Golden Million Asia Pacific嘅CEO,今年喺香港有四個大project,首階段七月就同大家見面!Harlan好有信心咁話,今次計劃概念好似將佢38年來以大廚身份,從旅遊、食譜中得到嘅經驗融會貫通,又話新店會貼近現時市道,「希望以負擔得到(affordable)價錢,提供最好的體驗」!

大家呢排行過中環擺花街8號都會見到,四個唔同發展概念,好似地下同一樓係「Eat Me Drink Me by Harlan Goldstein」,聽個名都估到,想食飯定坐低飲杯嘢都得!二樓My Tai Tai主打泰菜、三樓Ee Da Le主打意大利菜、五至六樓就會係古巴style酒吧同墨西哥菜,係咪聽到都覺得吸引先?

撰文: 黛安 消息特靈八卦公關
欄名: 八卦名利場