【聲明】港生活網站並無進行電話推廣活動

熊出沒注意! 元氣代言熊登陸朗豪坊

發佈時間: 2016/04/29

「人生如壽司,嚟緊乜,點會知(Life is like sushi)」,元氣壽司最新宣傳開始咗!元氣掌舵、日式連鎖餐飲(JCR)業務總監葉育康(康哥)話,每年都諗新宣傳,今年想帶畀大家多啲開心、驚喜感覺,好似迴轉壽司,「你未必估到下一件轉到過嚟係咩」。唔怪得噚日行到元氣朗豪坊分店,發現布置唔同晒,「代言熊」雄一正式進駐!

JCR亞太區市場部總監張婉明(Jodie)講起,元氣雖然係日本品牌,但紥根香港多年,係香港人生活一部分,品牌團隊設計雄一呢個角色,係想大家更有代入感,「好似有個朋友咁,陪住大家」。Jodie笑住話,係咁多idea中揀熊,除咗因為熊夠大隻、有安全感,仲有個原因——「熊食三文魚㗎」,啱晒品牌啦。

此外,康哥講到擴張計劃,預計今年有多5至7間分店,其中兩間係重新裝修、變身高速綫。記得以前康哥講過,日本高速綫運作,廚房同事有時間指標,壽司最高紀錄係一分半鐘送到客人面前。話說舊年香港元氣分店推出高速綫後,都派同事到日本考察同training,希望香港都盡量加快時間。

撰文: 黛安 消息特靈八卦公關
欄名: 八卦名利場