當年覺得家姐被搶 翠如同祖兒講數

黃翠如爸爸的建築公司上市後，翠如BB升呢做富家女，連帶屋企人亦成為傳媒焦點。有報道指翠如家姐與容祖兒是童年好友，翠如曾覺得祖兒搶走了家姐，她試過與祖兒講數。翠如昨日坦言知錯，強調關係亦早已破冰。

黃翠如昨天在銅鑼灣出席護膚品牌旗艦店開幕活動，見她心情不錯，似乎未受近日負面新聞影響。提到祖兒小時候搶走家姐，翠如BB笑了出來：「其實佢（祖兒）同我家姐由細玩到大，當時我叫佢去球場講數，我哋冇動手，只係鬧交，我叫佢唔好同我家姐出街，都幾霸道。」她澄清並不是與祖兒積怨：「一直以來佢好錫我家姐，所以講數之後已經畀家姐『抦』，我好快知道自己唔啱。其實家姐同祖兒、王祖藍都好熟，因為在同一個屋邨長大。」

重申唔識股市

翠如爸爸黃永華的公司上市，股價大上大落，被形容是明星股。翠如曾在訪問中表示內疚益了炒家，問她可擔心明星效應影響股價？翠如續稱：「我冇咁大影響力，怕影響到家人唔好意思，所以唔想講咁多，自己完全唔識，亦冇興趣買，我冇資格去評論。（怕連累股民輸錢？）第一日已講咗我唔了解，唔會因為我而買。」

男友蕭正楠同樣不懂股票，翠如透露他亦沒有買，至於該股近日波動較大，她苦笑謂：「財經版記者話唔係罕見嘅事，同我分析過，但我聽唔明，都係放棄去了解。」

此外，金剛和陳蕊蕊宣布分手，曾跟金剛合作過的翠如不予評論，只說：「希望每個人開心、健康同平安。（覺得可惜嗎？）兩個人之間嘅事，第三者好難去comment，關係從來是好難理解。」她和蕭正楠又會否常為小事嗌交？翠如坦言男友通常很遷就她，加上兩人的反應都慢，所以沒有嘈交。

採訪：Pauline

攝影：林良明

編輯：陳禮恒

設計：梁政敏