千嬅費神為仔揀小學

楊千嬅在電影《五個小孩的校長》中飾演一名善心的校長，其角色已深入民心，往後有不少學校舉辦的活動都會邀請她出席。昨日千嬅再度獲邀出席大學活動，不過着緊囝囝Torres的千嬅卻直言，教仔有難度。

楊千嬅昨日孖《五個小孩的校長》的導演關信輝、編劇張佩瓊、呂麗紅校長及財政司司長曾俊華，到香港理工大學出席《塑造品格共創未來》計劃啟動禮。

教仔有難度

導演關信輝在台上分享，談到媽咪當年患癌經歷，期間一度感觸落淚。而千嬅回想去年拍攝《五個小孩的校長》時，囝囝Torres正值入讀K1，令她感受更深，千嬅表示：「仔女嘅教育比我面對拍戲工作更困難，個仔就快完成K1，依家開始頭痛，事關佢入讀小學，要忙嘅事更多，加上細路仔嘅智慧唔比大人少，3歲以後就要引導同尊重佢嘅聲音。」

千嬅已努力為Torres揀一間合適的小學，她會從多項因素去選擇，對於現今小朋友容易被標籤，千嬅認為學校無可能只教育會講「Yes」的學生，要是遇着小朋友頑皮，甚至不懂得與人溝通就被認定曳和被標籤，這樣對小朋友很不公平，他們也很可憐。千嬅承認教育孩子是一門高深學問，每分每秒都會研究怎樣教仔，她又謂：「其實Torres好乖，只係有好多情緒表達，有時情緒釋放會掟嘢，其實佢遺傳咗媽咪耐力、成熟。」她又說兒子最初返學會喊，她明白始終他還是個BB。

撰文：Pauline

攝影：林良明

編輯：林梓添

設計：梁政敏