黃金時段搶收視 鄭則士黃光亮過氣大佬放笑彈

「我冇做大佬好耐喇！」這句對白聽得多，可惜人在江湖、身不由己，即使退下火綫，依然「有手尾跟」。新劇《火線下的江湖大佬》中，過氣江湖大佬鄭則士（Ken哥）重遇剛出獄、勢要東山再起的黃光亮，擦出爆笑新火花。

無綫臨時調動《火線》提前出街，皆因此劇是影帝Ken哥繼三年前《造王者》後的新作，自然有睇頭。

監製梁材遠笑言等足Ken哥三年，直至對方有檔期才開拍，但等待絕對值得。「Ken哥喺劇中同老婆陳煒開咗小食店，過住幸福生活，唔想重返舊路；黃光亮坐咗20年監，放監後想重出江湖，可惜已經同時代脫節，就算搵番以前嘅四大打手，都變晒老弱殘兵。兩位大佬今次係首度合作，係非常難得嘅組合。」

陳煒首次擔正

Ken哥在劇中協助眷戀昔日風光的黃光亮重新適應社會，過程笑中有淚。監製說：「亮哥喺劇中堅持着住20年前做大佬時嘅衫，又發覺以前搵開嘅按摩師『孖八』，依家已經變阿婆。Ken哥仲帶黃光亮去上水見識走水貨，畀人用拖篋碌到腳！」

首次做女主角的陳煒，劇中不但是Ken哥的現任妻子，更是黃光亮坐監前的女友，令Ken哥幾乎背負「勾義嫂」之名，他們的「忘年三角戀」笑位十足，令人期待。

撰文：李潔盈

編輯：林梓添

設計：鄧俊明