【聲明】港生活網站並無進行電話推廣活動

康宏傅提芬 港首位失明跑手完成波馬

發佈時間: 2016/04/21

馬拉松對普通人而言是挑戰,對視障人士來說,點止挑戰咁簡單。傅提芬(Inti)係香港首位完成全馬賽事嘅視障人士,之前無綫劇集《陪着你走》,胡杏兒飾演嘅角色就係以Inti為藍本。收到好消息,喺康宏金融任職客戶關係部嘅Inti,最近又完成一項創舉!由康宏理財聯席董事、義工隊主席陳子傑(Tommy)領跑下,Inti上月參加「世界六大馬拉松」之一嘅波士頓馬拉松,兩個人由麻省Hopkinton鎮出發,橫越8個城市,以波士頓Boylston Street為終點,最終用咗4小時39分完成全長42.195公里嘅賽事,成為香港首位完成波士頓馬拉松嘅失明女跑手,真係令人好佩服!

16歲確診患上青光眼、10年前開始完全失明,但Inti無因此而變得負面,近年仲開始跑步,話跑步令佢身體健康之餘,亦為人生注入正能量。佢已經參加16過個馬拉松賽事,仲以挑戰6個國際級馬拉松為目標。

Tommy回想領跑過程,話確保Inti順利完成賽事係佢今次參賽最大目標,仲話希望帶出「失明人也可跑出香港」呢個信息,以生命影響生命。

撰文: 黛安 消息特靈八卦公關
欄名: 八卦名利場