小鳳姐急call20個匿裙底小孩

徐小鳳將於暑假7月28日至8月2日在紅館舉行演唱會，小鳳姐的歌衫向來好靚，昨天記者會上她聲稱件衫好casual，點知一出場依然令全場「嘩！」聲四起，繼而她又再爆發笑彈，還踢爆鄭秀文和許志安sweet的一面。

記者會上，一眾後輩如楊千嬅、容祖兒、鄭秀文（Sammi）、梁漢文（Edmond）、Twins等預早拍片段向小鳳姐問問題。Edmond對小鳳姐的招牌波點傘裙最感興趣，還大膽問前輩的睡衣、內衣是否也是波點圖案？小鳳姐隨即解開疑團：「係冇嘅！波點只在台上着。」但佢話考慮個唱重演小朋友躲裙底跑出來的經典一幕。

考慮迷你裙登場

Sammi的問題更大膽：「小鳳姐有冇拍拖？好耐冇發市喎！趁青春攞番戀愛感覺。」怎料小鳳姐踢爆近日見到Sammi和老公許志安好sweet一齊去買粥，覺得很感動，不過小鳳姐談到感情生活，就笑謂：「其實我從未斷過拍拖，拖友係我啲歌迷。」

其後受訪時，小鳳姐表示有意聯絡當年個唱躲在她裙底約廿名小朋友重現舞台：「依家呼籲緊，希望啲人唔好亂認，要帶埋佢哋媽咪嚟，都廿幾年前嘅事。」又指考慮有勁歌熱舞環節，更稱可穿迷你裙騷長腿。平時說話風趣的她，有提議加插棟篤笑環節，小鳳姐謙稱：「真係好笑咩？平時我用來自娛引自己笑咋。」問邀請哪些嘉賓上台？她說想請林子祥，但擔心他早睡，她笑笑口謂：「一開場佢就出場，唱完咪返屋企瞓囉。」

採訪：Pauline

攝影：林良明

編輯：黃寶恩

設計：梁政敏