黛安
黛安

胡孟青帶囝囝學整手造梘 親子檔做義工

發佈時間: 2016/04/14

胡孟青帶囝囝學整手造梘 親子檔做義工

農曆新年過咗一排,大家有無留意過,唔同角落擺過嘅年桔去晒邊?上周末去灣仔聖雅各福群會,同太古集團義工一齊學整手造梘,突然聞到陣陣桔香味,聽導師Catherine講先知,手造梘要加「桔仔冰」,即係年桔榨汁再雪成冰,製作「大吉手造梘」。

公關Lydia話,「大吉Upcycling」環保活動踏入第六屆,以前回收年桔做果醬,今年搞搞新意思,將太古旗下商場同辦公室回收嘅年桔,用作環保手造香梘材料。除咗收集年桔,80多位太古集團義工抽空幫忙,話一日要製作出800件手造梘。

要整咁多件番梘,梗係要搵番幾位好幫手。青姐胡孟青都帶埋囝囝去做義工,話「未試過,要畀佢試下」,青姐教小朋友一向有心得,佢仲教路話「要放手畀囝囝一手一腳做」。除咗青姐親子檔,兩個基層家庭都獲邀參加,11歲嘅雄仔同8歲嘅阿鈴都分別同媽咪齊齊拍住上。唔落手落腳做都唔知,手造梘材料加埋晒之後,就要開始攪拌過程,人手攪拌起碼40分鐘,少啲臂力都唔掂。幾位小朋友表現非常落力,絕對唔輸畀現場嘅大人,個個都變晒「摩打手」。

聽雄仔媽咪龍太講,囝囝好專心幫忙,好似𥄫實溫度計等等,睇得出佢好鍾意參加。阿鈴媽咪楊太就話,平時無咩消閒活動,有機會一齊做義工好開心。

撰文: 黛安 消息特靈八卦公關
欄名: 八卦名利場