被重提當年秘婚 阿Sa：我已改邪歸正

蔡卓妍（阿Sa）前晚出席新戲《GOOD TAKE！》首映禮，她擔演其中一個單元《嚇鬼》，故事又驚又笑。近日盛傳阿Sa有新歡，她照例否認，並問大家有冇好男仔介紹，認真鬼馬！

有報道指阿Sa疑似拍拖，密會印尼餐廳太子爺蔣翹帆，阿Sa前晚重申：「唔係呀，我仲係單身，大家唔好係咁問我嘅感情世界，有就直接介紹畀我，寫我冇用㗎。」她又謂有認識新朋友，不過暫時未有發展空間。

承諾公開真•戀情

問她是否已準備好迎接新一段戀情？她表示不知道，反正仍未遇到對象。蔣翹帆是否由朋友介紹而認識？阿Sa稱：「識咗好耐啦。（係咪鍾意有上進心嘅男仔？冇樓都唔緊要？）我不嬲唔睇呢啲嘢。」另提到早前傳她與車行太子爺鄭子邦有發展機會，阿Sa不滿表示：「好多都係流嘅，鄭子邦係我同學，中三就識，識咗廿年啦，總之有戀情到時就會講。」

猶記得當年阿Sa與鄭中基拍拖時一直沒有公開，到被揭發秘婚時，兩人才宣布已離婚，事件轟動娛樂圈。問她有新戀情會何時公開，她續說：「結婚咪公開囉。（結咗婚先講？）我改邪歸正好耐啦，五年前改咗啦，仲抽秤我！」

撰文：Pauline

編輯：陳禮恒

設計：梁政敏