【聲明】港生活網站並無進行電話推廣活動

IEC教理財 設計6人1貓主題曲

發佈時間: 2016/04/12

噚日去PMQ同投資者教育中心(IEC)兩位管理層食飯,佢哋話要介紹幾位「新朋友」畀大家認識,六人一貓組合嘅「錢氏家族」!聽IEC總經理李博衛(David)講,香港人面對好多財務挑戰,但唔係個個識理財,針對唔同年齡、階層人士,特別構思金融理財教育平台「錢家有道」,透過錢家六位成員唔同背景、需要,等大家搵到一個可以「對號入座」嘅角色。

David話,自己最鍾意錢家寵物貓「錢錢」,不過成個家族入面,錢生呢個角色同佢啱channel啲,因為大家都係「一家之主」,精於理財之來餘,識得掌握最新金融消息。

IEC企業傳訊主管郭麗賢(Jeanette)就話,教理財難度係點樣將複雜資訊簡單化,錢家一家人嘅任務係「入屋」,好似退休人士對錢爺爺同錢嫲嫲有共鳴、錢生錢太嘅財務規劃同教育仔女就係時下父母嘅參照等。Jeanette話,希望角色帶畀大家親切感,熟習咗之後,再分享理財資訊。

撰文: 黛安 消息特靈八卦公關
欄名: 八卦名利場