中電下月 請老友記歎早茶

舊年中華電力（中電）同飲食業商會、區議員合作，舉辦社區項目「老友記嘆早茶」，活動啟動禮仲請埋財爺曾俊華參加，同一班長者齊齊歎「一盅兩件」，參加長者個個都好開心。反應正面活動自然要encore，公關姊妹傳來好消息，中電今年再搵埋四大飲食業商會同九龍、新界及離島14區超過360位區議員合辦活動，65歲或以上持有長者咭嘅長者就可以參加。長者可以向當區區議員登記，亦可以致電熱綫2678 6241查詢。

據講，中電確認名單後，會向4萬位長者每人派2張早茶券，等老友記5月3日至6月30日期間，憑長者咭同早茶券星期一至五朝早11點前，到區內超過170間參與計劃酒樓免費享用劃一早茶餐單內兩款點心，仲免茶芥同加一服務費㗎！

今次活動由中電股東撥資200萬元支持，請老友記飲茶，更想鼓勵老友記多啲參與社交活動。中電總裁潘偉賢就話，香港人口持續老化，需要關顧長者也愈來愈多。今年決定再舉辦活動，希望更多長者感受到社會關懷。