沙嗲軒推獅城街頭小食 要食客「榴槤」忘返

新鮮大蝦炸到金黃色、咬落香脆，再加埋煉奶同麥皮，諗一諗都想像到有幾惹味，估唔到沙嗲軒會將呢款80年代流行嘅新加坡菜式加入菜單！收到公關姊妹消息，原來佢哋搵嚟新加坡富麗敦酒店助理廚師長王春振師傅，同沙嗲軒廚師團隊，以新加坡街頭飲食文化為靈感合作炮製八款全新菜式。廚師Kelvin分享靈感來源：「街頭美食係新加坡獨有飲食文化，係新加坡人生活一部分，亦係每天會食到嘅美食。」新menu保留咗經典菜式，例如黛安每次去都會點嘅招牌海南雞飯、仲有即叫即燒嘅沙嗲串，提起已經食指大動。

主菜之外，黛安覺得，一定要試沙嗲軒最新推出招牌榴槤布甸，聽講佢哋只會選用最甜、最軟滑品種嘅榴槤，食落口包你一解「香」愁咁話，三間沙嗲軒分店都有得供應啦！