【聲明】港生活網站並無進行電話推廣活動

林鄭孖中電潘偉賢 聽幼園生講故仔

發佈時間: 2016/08/10

形象硬朗嘅政務司司長林鄭月娥都有柔情一面!話說林鄭噚日同中電總裁潘偉賢(Paul Sir)、中電企業發展總裁莊偉茵(Qunice)一齊出席中電幼稚園教材套啟動禮,聽小朋友講慳電故事,聽到興起仲同佢哋玩手偶公仔。中電公關姊妹話,林鄭月娥身兼氣候變化督導委員會主席,兩個囝囝分別叫林節思及林約希,中間名字夾埋就係「節約」,搵司長主持揭幕,夠晒貼題。

講起呢套教材《看到的電力》,中電可以話係首間商營機構咁有心思,為咗從「小」入手,將慳電概念融入故事書、兒歌同桌上遊戲,派畀全港近千間幼稚園,唔怪得林鄭會話好少出席商業機構活動,今次都出席支持。

公關姊妹仲話,為咗吸引班同學仔,中電搵咗本地插畫師b.wing創作故事主人翁「超人中中」,由佢變身電力專家,教小朋友電力安全和節能的基本知識。佢哋仲搵埋金像獎得獎音樂人戴偉創作兒歌《慳電乖乖》,加埋歌手林二汶把靚聲,配合卡通動畫,小朋友就可以唱住歌仔學慳電。

撰文: 黛安 消息特靈八卦公關
欄名: 八卦名利場