【聲明】港生活網站並無進行電話推廣活動

7-Eleven有得買旅遊保險 富衛新銷售模式吸客

發佈時間: 2016/08/11

大家試過旅行臨出發,醒起唔記得買旅遊保險,要即刻搵幫手?收到7-Eleven公關姊妹消息,品牌再擴闊服務種類,即日起全綫7-Eleven買到富衛保險推出嘅零售旅遊保險卡,以後去旅行前行入7仔,唔止買到電話卡,連旅遊保險都一take過搞掂!

富衛香港及澳門CEO黃大偉講起,今次同7-Eleven策略性合作,可以話係開創業界先河、全港首創、仲話「作為敢於創新嘅保險品牌,我哋會繼續拓展唔同策略夥伴合作,做到與時並進。」富衛香港業務拓展部主管梁鎮業就話,香港人鍾意去旅行,買旅遊保嘅意識成熟,客戶去便利店隨時買到係「最大的方便」。

7-Eleven香港及澳門電子商務及服務發展部總監林家兒都話,首次引入旅遊保險卡,運用品牌廣泛店舖網絡、方便嘅店舖位置,同24小時營業時間,買旅遊保更方便,顧客就有驚喜同愉悅嘅購物體驗。

姊妹仲話,數據顯示,超過9成旅客外遊行日數都係16日內,所以旅遊保險卡有6日、10日同16日以下旅程可揀,價錢分別係$120、$160同$200。顧客畀錢後憑收據上獨特代碼(promotional code),上富衛電子商貿平台輸入代碼即可安心出發。

撰文: 黛安 消息特靈八卦公關
欄名: 八卦名利場