【聲明】港生活網站並無進行電話推廣活動

睇住港台新節目 跟世界代表學惜食

發佈時間: 2016/08/12

認識靚女主持人鍾潔嵐(Kannie)唔係好耐,但聽佢分享做主持、到世界各地採訪經驗,已經知道佢喺個好有冒險精神嘅人。港台節目《惜食地球人》嘅編導和監製相信都感受到呢一點,早前就搵Kannie去唔同國家訪尋珍惜食物各種方法,其中包括「食蟲」。一聽到呢兩個字,大部分人都會驚一驚,Kannie話原來都有少少驚,但要將用草蜢等材料煮成嘅菜式放入口時,感覺其實無想像中咁差。

其實「食蟲」只係節目其中一集,面對全球8億人口無足夠食物等問題,製作隊伍花咗幾個月搜羅世界各地惜食代表人物,希望透過一連5集嘅《惜食地球人》,同大家分享非洲、美洲、歐洲和亞洲等地嘅人民,點樣改變生活習慣變身惜食之人。Kannie話完成拍攝後,喺新加坡學到城市農場種植法,返到屋企都親自嘗試種更多可供食用嘅蔬果、香草,效果好好𠻹!

下星期一晚播出節目會講歐洲一些惜食勇士,如德國食物分享組織,發起人Rafael Fellmer以「不用錢生活」聞名各地,喺全球有唔少跟隨者。另外「本地薑」、香港廚餘專家Alvina會用廚餘教大家點樣唔浪費食物炮製法國菜,唔知大家學到幾多招?

撰文: 黛安 消息特靈八卦公關
欄名: 八卦名利場