一街老友記……講鬼故

農曆七月鬼節又到，藝人經常出外工作，不時親身經歷或聽聞靈異故事，今次找來他們分享自家恐怖鬼故，實行又要驚，又要睇。

阿嬌：女鬼伏窗邊

入行冇耐嗰陣，我有次坐保母車出發，為「鬼王」雷宇揚嘅電台節目做嘉賓，當日係紅雨，我見到車外竟然有溪錢飛來飛去，司機仲突然扭軚，嚇到我！後來到咗目的地，司機講當時佢見到有長髮女鬼伏喺車窗邊，所以佢先扭軚想揈開對方，仲發現架車有疑似指甲劃過嘅痕迹！

王浩信：死都聽鬼故

我聽過最恐怖嘅，係有次一班朋友去長洲玩，夜晚喺度假屋熄晒燈，圍埋一個圈講鬼故。其中一個人本來滔滔不絕，但佢點咗支煙後，就成晚都唔再出聲。第二日成班人坐船離開，佢先講番原來當佢撻着打火機嗰一刻，發現左右兩邊，有兩個唔識嘅人頭伸埋嚟，要一齊聽鬼故……

滕麗名：嘩鬼咬大髀

有年我去日本拍旅遊節目，夜晚同女同事喺酒店一間房瞓，我瞓瞓下發現被鬼壓，我好辛苦掙扎先郁到，即刻叫隔籬床個女同事，但佢好驚咁大叫：「我乜都睇唔到！」第二朝我發現我大髀多咗個牙印……直到依家，嗰位女同事都唔肯講佢當晚見到啲咩。

歐陽震華：鬼阻你開大

有次我返公司開朝早06，諗住走上兩層比較少人嘅廁所辦大事，一坐低就聽到廁格敲門聲，開頭以為係清潔阿姐，但諗諗下發覺阿姐如果敲門，會喺男廁門外敲，而且咁早成層樓都冇人……嚇到我咩都縮番入去，即刻衝門跑樓梯離開！

呂慧儀：細路鬼攞糖

逢星期日，兒童節目先會開廠拍攝，有次我見個女同事氣色好差，問佢係咪唔舒服，點知佢話因為請人食糖出事。原來佢有日拎咗啲糖返廠請大家食，現場一個有陰陽眼嘅同事，見到佢啲糖引咗好多細路鬼跟住佢，所以先搞到精神咁差。

撰文：李潔盈

編輯：林梓添

設計：Simon