社企月餅 製作包裝夠窩心

中秋將至，唔少社企有賣月餅，由製作到包裝都有窩心細節，專門訓練同聘用殘疾人士嘅東華三院社企iBakery推動「不同能力，同一熱愛」理念，旗下8間分店逾70名僱員中，過半數係殘疾人士。iBakery今年出品1盒4個迷你蛋黃白蓮蓉月餅，全部係同事親手製作，限量生產，質素肯定有保證。原價$168嘅月餅，8月15日前訂購有88折，詳情可登入http://goo.gl/yhTSR1。

收益變「膳」款助基層

品嘗社企出品外，大家仲有機會幫助基層。九龍樂善堂「金秋皓月」慈善月餅，今年收益扣除成本後，全數撥捐樂「膳」堂營養膳食服務中心，善長每買1盒月餅，捐款可為1戶基層家庭提供10餐營養膳食。今年仲有轉贈月餅計劃，大家可捐款買月餅，由樂善堂轉贈弱勢社群，等基層家庭同享節日歡欣。查詢或訂購，可以致電2272 9864。8月19日前訂購仲有折扣，8個迷你奶皇月餅，優惠價$238。

唔講唔知，今年月餅盒封套係由樂善堂梁銶琚書院6位同學設計，其中一位係患重肌無力症嘅胡俊彥。胡俊彥爸爸胡應聰，為照顧囝囝轉職的士司機，但2015年不幸於車禍逝世。從不幸中領悟「珍惜現在」嘅胡俊彥，期望用作品鼓勵大家遇到逆境都要積極面對。