迪士尼文化大使 照顧多國遊客需要

「日、韓遊客多數想知迪士尼朋友出沒地點同時間；回教信仰客人會問邊間餐廳供應清真認證食物」，愈來愈多東南亞遊客到訪香港迪士尼，樂園去年起推出文化大使計劃，由識得唔同語言嘅大使輪流當值，完善遊客體驗。文化大使Coco同Charles，除廣東話、普通話同英文，前者講流利日文，後者印尼話、馬拉話、菲律賓話都講得好掂。兩人都話，最開心係遊客聽到熟悉語言都眼前一亮。

原本在賓客服務部工作嘅Coco話，大學主修日文，但工作幾年少講難免生疏，擔任大使後發現，幫到賓客，自己又多咗機會講，更學到最新潮語。分享難忘經歷，佢話試過有位日籍女遊客哭住求助，前綫同事未能處理，急忙搵Coco幫手，遊客一聽到佢講日文，才停止喊聲慢慢講發生咩事。原來喺樂園玩咗幾日後唔見咗相機，如果搵唔番回憶都會無晒。」最終佢哋都成功為遊客搵番相機。

來港工作6年的Charles話，自小在馬來西亞長大、識得多種語言，原本在園內景點營運部門工作，好少機會同遊客傾偈，但做咗大使後多咗機會，更笑說平日留意賓客英文口音，就會知可用哪一種語言「隨時轉channel」。