模界模範夫婦變「裝修師傅」 義助長者翻新家居

唔少人都會八卦明星夫妻放假會去邊㗎呢？模界模範夫婦Jocelyn Luko同老公Anthony Sandstrom上星期六就去做義工，同仁人家園嘅青年義工一齊幫長者維修同清潔家居，夠晒溫馨！Jocelyn喺instagram都有上載相，大讚老公都好勤力。

話說4位義工去咗荃灣梨木樹邨，幫78歲嘅霍婆婆維修剝落嘅廚房天花板同牆壁，睇相就知唔易做。好似Anthony負責廚房部分，企上木梯剷走剝落天花，Jocelyn負責蹲下剷牆壁剝落油漆。雖然做到滿身石灰同汗水，個個依然落力剷灰髹油，中間休息時仲熱心同霍婆婆傾偈，氹到婆婆好開心，仲一齊selfie。

第一次到訪公屋嘅Jocelyn，眼見單位惡劣環境覺得好感慨話，「家，應該係帶畀人安全感嘅地方」，完成任務之後，佢哋都話好開心親手為長者帶來安穩的家。Jocelyn講起，「幫別人維修家居帶來滿足感，又可接觸到有需要家庭」，仲有兩個月就生日嘅佢仲鼓勵大家，趁生日做義工，笑說「會係一份雙贏（Win-Win）生日禮物」。