《e-zone》年度品牌獎 頒獎禮陣容鼎盛

年度盛事、由《e-zone》主辦、《香港經濟日報》協辦嘅e-brand Awards 2016噚日順利舉行，頒獎禮有好多嘉賓支持。今屆主題係「智能十年‧革新未來」，4個組別頒發86個獎項，仲有3位行業翹楚奪得「IT傑出人士」（IT Excellence）大獎。今年大贏家之一係華碩（ASUS），有5個獎項；電訊盈科集團旗下多個品牌就有9個獎大豐收。此外，惠普（HP）都奪得4個獎。聯想（Lenovo）都好威水，繼續蟬聯今屆「e世代至尊電腦品牌大獎」。

香港經濟日報集團社長兼《晴報》社長麥華章大讚，《e-zone》為讀者打造資訊最豐富嘅平台，綫上綫下都滿足到讀者需要。e-zone總編輯林燦輝都講起，頒獎禮一年比一年成功，獎項由以往30幾個增加到依家近100個，又希望選舉吸引更多年輕人投身業界。今年3位IT傑出人士大獎得獎者分別係龍沛智、林榮達同伍小慧，表揚3人一直為所屬品牌、機構帶來新科技思維同成績，亦為社會資訊科技範疇帶來唔少貢獻。