【聲明】港生活網站並無進行電話推廣活動

陳南祿玩新意 商場管理叫Service Delivery

發佈時間: 2016/08/19

噚日同恒隆管理層飯聚,恒隆地產董事總經理陳南祿(Philip)同集團助理董事關則輝(CF)經常互相取笑,CF打趣說Philip是「走難CEO」,話說佢哋剛完成每年兩次Town Hall,即係去全國唔同城市見同事,講解公司業績同聆聽同事意見。有時3日走訪內地4、5個城市,行程超緊密,難怪話趕到好似走難。雖然趕得辛苦,但佢哋梗係無有怕,因為可跟同事保持交流。

講起內地商場管理,Philip話要有新思維,以前管理商場大小事如冷氣、燈光等,叫Property Management物業管理,依家要重視顧客體驗,故改名叫Service Delivery,即係着重服務。點解咁講?Philip用瀋陽做例子,當地冬天時室外近零下30度,室內溫度通常保持20度左右,行入商場門口立即變成20度,中間成50度溫差,從顧客體驗諗,就知商場溫度由入大門開始要慢慢調節。

呢份細心黛安噚日都體會到,話說出發前天氣放晴,午宴後突然又落雨,正諗緊點算好,佢哋同事已經準備咗恒隆雨遮,咁小事都留意到,係咪抵讚先?唔止讚,同事做得好仲有獎。恒隆地產年度「綠寶石客戶服務獎」早前頒獎,表揚前綫員工喺顧客服務範疇卓越表現。今年6位得獎者分別來自香港淘大商場、上海港匯恒隆廣場及港匯花園、瀋陽皇城恒隆廣場同濟南恒隆廣場。

撰文: 黛安 消息特靈八卦公關
欄名: 八卦名利場