從前的屯門，猶如西北荒蕪地，時代巨輪運轉下，新商場及西鐵的出現，令昔日偏遠地區變得繁榮，更有不同食店進駐，當中包括獨特「豬料理」，又有由法國藍帶廚師煮理的甜品；亦有談咖啡、談人生，招徠奮鬥同路人的咖啡店，各有特色。
1. $34皇牌豬扒麵 豬大王
「豬大王」進駐屯門約三年，老闆黎先生從事粉麵生意十多年，曾在元朗開小食店，由於住屯門十幾年，令他決定再開食店，並紥根屯門。「做生不如做熟，我決定做番粉麵，再諗下新噱頭，做好幾樣嘢，貴精不貴多，吸引街坊客。但講到做生意，喺屯門區真係幾難做，屯門雖然地方大，但唔同屋邨分得好散，只可做到熟客，再口耳相傳，生意先至Keep到。」
店名「豬大王」，顧名思義專食「豬料理」，最馳名是「皇牌豬扒麵」，因認識相熟豬販令食材品質有保證，豬扒每天早上自家醃，即叫即做，客人需靜候等待才會吃到熱辣靚豬扒，加上黎生處理生麵恰到好處，麵質爽滑，配合起來味道一流。
豬大王
地址：屯門青山公路青翠徑多寶大廈地下38號舖
電話：9081 6670
2. $52 Creme Brulee班戟 班戟館
「班戟館」新開業短短一個月，老闆娘Karman從事科技行業十多年，一次機緣巧合認識從法國藍帶學成歸來的阿Jim，二人一拍即合，與另一位朋友合作開這間法式甜品店。Karman說：「我做IT近15年，以前做成一單十幾萬嘅生意，只係覺得好辛苦，滿足感唔大。年紀大咗想轉變，同阿Jim理念相近，試下創業！」為甚麼選屯門呢？「我哋覺得好多人誤解法式甜品，而我同阿Jim都希望將傳統法式嘅Crêpe與Pancake味道，帶畀客人，甚至將它們變得更平民化。而屯門呢個地方好有生命力，不斷有改變，客人嘅接受能力又好高，經常發生好多意想不到嘅事。」
阿Jim插嘴說：「試過有次深夜幾個男人衝入嚟，原來係起鐵路嘅工程師，其中一位外國人見到Crêpe，即刻食一個仲要外賣。有時仲有機場地勤約埋一齊嚟，好開心好感動。」
班戟館
地址：屯門井財街9號地下20B號舖
電話：5185 6114
3. $48初戀特飲 海圖
「海圖」咖啡店，不但談咖啡，亦談夢想與人生。老闆海源之前從事營業員，後來往澳洲工作假期，被當地「Work hard、play hard」的精神深深感染，回到香港，希望將這種精神帶給更多香港人。
他說：「在澳洲工作真係改變咗我好多，返到香港，發現屯門已經無一個Hea嘅地方，同埋自己由小到大都喺屯門生活，所以想喺呢區開咖啡店。」小店位置較隱秘，並不容易找到，但對於店舖宣傳，海源卻另有辦法。他會定期在「海圖」的facebook專頁，打上自己的奮鬥故事，吸引一班志同道合的客人，客人更漸漸成為朋友。
海源表示：「曾經有客人同我講，睇咗我嘅故事，感覺好溫暖，好激勵。然後我回應佢，因為大家每日都喺度奮鬥緊，我Share自己嘅故事，就係想令人覺得行理想之路，並不孤單。」咖啡店內，除了可發掘不同故事，食物與飲品亦絕不馬虎，例如近期推出的「初戀」，大玩戀愛味道，初戀青澀但有甜味，回憶總是美好；夏天時呷一口「初戀」，冰凍感直達全身，讓人憶起往事，幾重滋味在心頭。
海圖
地址：屯門虹橋青柏徑6號鹿苑16號舖
電話：3563 6601
撰文：唐蔚霖
攝影︰梁細權
編輯：余運慶、余敏
插畫：Human Ip
設計︰招潤洪