富豪東方酒店「杯麵蛋糕」 成個都食得！

食甜品要好味之餘，賣相當然好重要，皆因依家幾乎個個都「相機食先」。富豪東方酒店行政總廚Billy就話靈機一觸，用杯麵crossover蛋糕，變出至潮杯麵蛋糕，睇相都已經覺得好得意！

最特別嘅係杯麵蛋糕外殼用糖紙製成、杯蓋就係白朱古力，即係成個都食得！蛋糕仲有兩款口味，「紅燒牛肉杯麵」同「親子三文魚籽杯麵」，前者用咗朱古力布朗蛋糕做牛肉粒，再用開心果碎做蔥；後者就係士多啤梨慕絲加海綿蛋糕做底，面頭鋪脆口紫菜同士多啤梨啫喱，加埋橙味爆珠做三文魚籽，像真度都幾高。