港產跳繩冠軍 獲邀昂坪獻技

大家應該都記得，香港代表隊早前喺「世界跳繩錦標賽」成功奪冠，比賽片段一度喺facebook洗版。估唔到昂坪360反應咁快，旋即邀請到世界冠軍跳繩隊喺昂坪市集公開表演，認真抵讚！有機會一次過欣賞到世界冠軍跳繩隊總教練鄭淦元，帶領香港代表隊01（港隊01）一眾成員，包括首位華人跳繩世界冠軍何柱霆、首位華人個人花式跳繩冠軍周永樂，同埋黃啟銘、沈保衡、劉浩男，真係好榮幸。

財爺曾俊華同昂坪360董事總經理關敏怡（Stella）噚日出席活動發布會，大讚跳繩隊為港爭光之餘，仲同「凝動香港體育基金」招募嘅小朋友一齊跳大繩，體驗跳繩的樂趣。Stella講起，原來昂坪360同首位華人跳繩世界冠軍何柱霆，結緣於舊年昂坪市集舉行嘅一個國際挑戰賽事，好開心請到跳繩隊全隊返港表演，仲話希望市民同遊客都有機會親身欣賞得到。

一向熱愛運動嘅財爺就話，之前喺網上睇到香港跳繩隊比賽片段，已經覺得技驚四座，噚日近距離欣賞現場表演，更加覺得好開心，仲叫大家都要把握機會去昂坪市集，欣賞佢哋精湛嘅花式跳繩演出。

講開又講，今次「奪金花繩360」唔止有花式跳繩表演，大家仲有機會體驗跳繩樂趣，因為4個表演日期間，總教練鄭淦元會親自去現場教授花式跳繩，4至11歲嘅香港小朋友都可以參加，名額有40個，參加辦法就要留意香港花式跳繩會官方Facebook。

獲選嘅參加者，當日可以免費搭昂坪360纜車，完成工作坊仲會得到獲鄭教練親自頒證書，兼同世界冠軍跳繩隊影相留念。