花旗促成新app 個人信貸評級免費查

花旗集團又有好消息，集團2015年邀請世界各地嘅金融科技專才參加Citi Mobile Challenge，最後榮獲亞太區Citi Mobile Challenge「最佳理財方案」獎項嘅Mtel，成功開發創新應用程式「CreditCheck」。香港市民下載App，可首次免費獲取由環聯提供嘅個人信貸資料，當中包括A至J級別嘅信貸評分，財務狀況健唔健康即刻睇到。

環聯香港個人客戶業務總監羅瑞都強調，經常查閱信貸報告，保持良好信貸評分好重要。花旗銀行信用卡及無抵押信貸業務主管林松佑都講起，透過呢個創投項目，花旗仲可尋找到能夠應用喺業務上嘅新方案，同時提升客戶使用銀行服務嘅體驗。Mtel首席營運總監暨首席技術總監鄒浩威就話，期待CreditCheck可以幫助大家更方便同有效咁管理個人財務狀況。