10月紅館騷 阿Sam玩民選金曲

「歌神」許冠傑（阿Sam）將於今年10月27至29日假紅館舉行一連三場演唱會，有眾多經典歌的阿Sam，一晚無可能唱得完所有金曲，決定由觀眾票選最想聽的歌，好讓他在個唱上演繹出來。

主辦機構大名娛樂昨日在西環一間酒樓舉行造勢大會，阿Sam的兩個仔許懷恩和許懷谷、許冠文的兒子及阿Sam的契仔Justin到場支持。

懷谷快將做老竇

活動後，阿Sam和兩個仔一齊接受訪問，阿Sam透露目前已積極進行健身，希望以最fit狀態上台。問到會否再加場？他表示要視乎反應再決定。對於今次開騷的歌由樂迷票選，這種方法相當新穎，阿Sam笑言：「咁啱今年係選舉年，就由樂迷投票，我哋好民主嘅。總之樂迷揀咗咩歌我都會盡量去唱，唱夠三、四個鐘！」阿Sam又透露在本周日（28號）會親自到街上進行拉票，亦期待到時能近距離與樂迷見面。

談到今次個唱嘉賓，除了兩個囝囝之外，還有大哥許冠文，阿Sam多年前曾與他一齊主持相聲節目，今次兄弟同台會更有默契。阿Sam透露屆時哥哥會間場現身棟篤笑，貫串整個演唱會，其他嘉賓還有糖妹、何傲兒、吳若希等。他又興奮表示自己又做爺爺，新抱Ida（懷谷太太）臨盆在即。不過他正考慮帶另外兩個孫仔一齊Jam歌，懷恩笑言：「囝囝最叻唱《財神到》！」在旁的阿Sam提起孫兒即笑得合不攏嘴。之前阿Sam在網上挑機黎明扮明蝠俠，不過Leon已回覆阿Sam他不懂得做豹紋衫，阿Sam笑言只是貪得意玩玩而已。

採訪：Pauline

攝影：Lego

編輯：林梓添

設計：梁政敏