紅磡從前是天然海灣，填海後形成今日地勢，黃埔的「大船」更是標誌性建築。區內有眾多美食熱點，愛中式美食？可到創意小店嘗Fusion點心；喜歡歎平靚正海鮮？必嘉街有好選擇；想試美式熱狗？小區同樣找到。今個星期，一於到這裏展開你的美食之旅。
1. $16櫻花蝦粉果 一粒米點心專門店
「一粒米點心專門店」落戶區內近一年，老闆梁先生表示因為店舖供應飯麵類及點心，本想將店舖命名為「飯桶」，後來想過「沒有米、哪有飯」，「一粒米」由此而生。梁先生與哥哥合作開設兩間分店，惟紅磡店才可「坐低飲杯茶、歎個包」。
梁先生做點心師傅十多年，他說：「從前打工，腦海有好多新想法同構思，但由於始終係打工，有好多嘢唔容許自己發揮，所以最後我同阿哥一齊開舖，至可以發揮創意。」
要數這裏的創意點心，必選將中式點心技巧混合日式材料的中日fusion款式，特別是「櫻花蝦粉果」，皮薄餡靚，自家搓皮，一開蒸籠，賣相十分粉嫩誘人，吃一口，日式櫻花蝦夠清香，可謂色香味俱全。
一粒米點心專門店
地址：紅磡黃埔街24號地下D號舖
電話：2468 1980
2. $98極品龍蝦海鮮湯 Seafood Stand
「Seafood Stand」顧名思義主打海鮮，老闆Larry認為紅磡從前是個天然海灣，而且紅磡與海有着「等號」關係。他未入行前，從事iBanking，因為愛旅遊，吃盡不同地方海鮮美食，後來轉型為海鮮批發，機緣巧合下決定自己開店，將靚海鮮帶給客人。
Seafood Stand三間分店各有特色，Larry說：「廚藝本身屬藝術嘅一種，廚師們亦是人而非機器，唔想扼殺佢哋嘅天份及才能。所以在供應七成固定菜式嘅同時，容許各廚師們再以三成空間創作自己嘅菜式。因此每間分店都有啲特色菜，希望客人去唔同嘅分店，都會有驚喜。」
縱使已開了三間分店，創業路看似平坦，但中途亦經歷小挫折，就是曾被自己僱員抄襲菜式後自立門戶，事情發生後，員工士氣極低落，因多年來的創作竟被剽竊盜用。現時大家已收拾心情，並將菜式製作的保密工夫盡量做好。
說到創意菜式，推介新推的「極品龍蝦海鮮湯」，以新鮮龍蝦熬湯，味道十分香濃，而全隻小龍蝦如「霸王」坐在湯中。加上湯中有不同海鮮，好比一頓小型海鮮小拼盤，帶來視覺、味覺、嗅覺的三重享受。
Seafood Stand
地址：紅磡必嘉街聯盛大廈鴻運閣地下13號舖
電話：2968 0606
3. $51超級黑松露森林 ICONIC H特色熱狗店
「ICONIC H特色熱狗店」在紅磡開業近兩年，提起當初創業，原來都是因為愛吃。老闆Karena說：「我哋一眾Partner都好鍾意食熱狗，但發現香港嘅熱狗淨係得香腸加醬汁，無乜特色，所以我哋希望將新口味嘅熱狗帶畀客人。」
問到店名由來，Karena笑說︰「之前自己做過好多份工，公司名都係由『I』字行頭，希望延續『I』字公司嘅傳統，而『H』指Hot Dog意思，有標誌性的熱狗，同埋我哋都有遠大嘅夢想，希望將來會出現其他Iconic「B」（Beverage）或者「P」（Pizza），帶來更加多新感覺、新意思。」
店內推出的熱狗甚有心思，取材更是非一般。特別是「超級黑松露森林」，烘得熱辣辣的熱狗包，包着厚厚的黑松露煎滑蛋，傳來濃濃黑松露香，再配上來自德國的煙熏腸，一啖熱狗入口，多種層次，豐富惹味。好味熱狗，還要配上特色飲料「菠蘿啤」。啤酒來自德國，沒有酒精，但啤酒味甚濃，倒入粒粒新鮮菠蘿肉，香甜可口。
ICONIC H特色熱狗店
地址：紅磡必嘉街97號黃埔唐樓C座106A舖
電話：5595 5981
撰文：唐蔚霖
攝影：林良明
插畫：Human Ip
編輯：余運慶、余敏
設計：大雄