劉小華西九擺檔 幫人影相籌款

相信每個人童年時，都玩過摺飛機。今年西九文化區自由約又有新搞作，就係首次搞親子紙飛機切磋大會，之前仲公開招募咗30隊伍喺9月11日到場比拼，除了父子檔，仲有68歲丈公及7歲姪孫仔參加，真係全家都咁出力！公關仲透露，如有空缺，到時仲可以即場報名，每隊最多6個人參賽。想參賽就記得當日5點半，準時去到西九苗圃公園的大圓表演場地啦。

想靜態點，不妨帶小朋友去9月11日至10月8日舉辦的ohmykids孩子市集，幫襯下由細路仔做老闆的10個檔口仔，連紅爆網絡的「繁忙兒童」劉小華（劉皓嵐）都會擺檔幫人拍即影即有相，一半收益仲會捐畀弱勢兒童做免費學習支援。