蒸肉餅變「豬肉刺身」 食客呻倒楣

出街食飯最怕被「加料」或食到一肚氣。有網民在fb專頁「盡在元朗」貼圖，指光顧區內一間茶餐廳，點了蒸肉餅，後來發覺豬肉未蒸熟，事主在帖文指：「同阿姐講，阿姐話係咁㗎喎！咁嘅對答，真係好失望」。

圖片吸引逾500人like及表示憤怒，有網民批評「豬肉生成咁好離譜」及「生豬肉食壞人咩」，亦有人笑稱這是「肉餅刺身」及「半生熟肉餅飯」。但有人認為事主也有責任，為何食完碟飯才提出問題。