環保唔做大嘥鬼 婆婆以物易物換「飲衫」

買嘢是香港人最愛消閒活動，但一個唔小心買到塞爆屋企，其實可捐出去，唔使丟咗佢做「大嘥鬼」。世界綠色組織（WGO）昨日喺尖沙咀文化中心廣場搞咗個「惜物。易物嘉年華」，除咗有攤位教大家點將舊T恤改造杯墊、用牛奶盒整散紙包，仲有樂隊Supper Moment用環保樂器演奏，搞到在場百幾人個個都咁開心。

WGO行政總裁余遠騁（William）話：「好多人拖晒篋來以物易物，不知幾有心。」在場所見故事書、玩具同衣物都係熱門捐贈物品，「交換量」達數百件。William透露嚟緊會去唔同屋邨搞以物易物活動，絕對唔會浪費今次收到的物資，仲話有個婆婆通過換物活動換到件「飲衫」去飲孫仔滿月酒，不知幾有用。