林峯自認反應遲鈍 任男粉絲摸胸無有怕

林峯粉絲一直以來雖然女性佔大多數，不過男粉絲亦有不少，昨日他出席簽唱會，就有男粉絲上台玩遊戲作狀要錫錫，令林峯也嚇了一跳。他直認曾有hehe粉絲十分熱情，可是自認反應遲鈍的他過後才知，又話不介意有hehe粉絲支持自己。

昨日簽唱會上，林峯不單表演勁歌熱舞，到活動完結後還為500名歌迷簽名。不過在第一個遊戲中，矇着眼的歌迷觸摸三位男士的手臂及胸口等身體部位，再估哪一位是林峯，當中一名男粉絲肆無忌憚在他的胸口不停摸，令台下嘩聲四起。

及後林峯宣布由該名男粉絲勝出，兩人合照時，男粉絲又作狀向林峯咀嘴，相當搞笑！事後問林峯可介意男粉絲如此親暱？他笑言：「最緊要玩得開心，亦多謝大家支持。」記者笑問他是否近年經常騷肌，所以吸引男粉絲？他笑言：「唔知。有大家支持已經好開心。（想成為基界男神？）唔介意，其實身邊都有好多唔同界別嘅朋友，最緊要喜歡我嘅音樂。」

問到林峯可試過有男士向他表白？他坦言本身比較遲鈍，更帶笑自嘲：「你哋都知我kai kai地。（有冇男粉絲摸你pat pat？）印象中又冇，放電囉，第一時間我都唔知點反應，但係又唔會驚，佢哋都好友善嘅，可能人哋電力充足呢！」

翻睇舊劇做大茄

談到近日在深夜時段重播《創世紀》，當年還是「大茄」角色的他笑言：「監製要搵個識國語嘅人扮獄卒，所以就搵咗我，我好記得同郭可盈做對手戲，（有冇睇重播？）又唔會刻意睇，也唔會唔慣睇番以前個樣，其實都係一種經歷。」

採訪：Pauline

攝影：Lego

編輯：林梓添

設計：k