迪士尼CEO劉永基 聽收音機學中文

香港迪士尼樂園度假區CEO劉永基（Samuel）上任，至今已差唔多半年，時間真過得快。上星期第一次同Samuel茶叙，講開原來佢已經同過百前綫員工開會，了解唔同部門運作，上星期仲趁有3日時間，走訪內地珠海、惠州、順德等城市，落手落腳介紹迪士尼最新嘅主題園區。

Samuel勤力之餘仲好風趣，大爆自己唔識睇中文，講笑話只有小學五年班程度，叫大家唔好笑佢呀。原來Samuel大學同中學都喺美國讀書，屋企人講客家話多過廣東話，所以連埋英文同普通話，佢識得4種語言，分分鐘勁過唔少香港人。

其實Samuel唔講，一啲都唔察覺佢唔識中文，因為廣東話講得幾流利，究竟佢係點樣自學呢？佢話有時睇中文餐牌估估下就識，平時揸車就一定扭開收音機聽下新聞；喺公事上，佢更大讚同事平時都好細心幫佢繙譯。所以由舊年10月喺美國迪士尼調返香港，Samuel已經進步神速，仲教識埋一對15歲同13歲喺國際學校讀緊書嘅仔女，講簡單中文同搭港鐵周圍玩，對佢哋嚟講已一啲難度都無。