【聲明】港生活網站並無進行電話推廣活動

迪士尼CEO劉永基 聽收音機學中文

發佈時間: 2016/09/02

香港迪士尼樂園度假區CEO劉永基(Samuel)上任,至今已差唔多半年,時間真過得快。上星期第一次同Samuel茶叙,講開原來佢已經同過百前綫員工開會,了解唔同部門運作,上星期仲趁有3日時間,走訪內地珠海、惠州、順德等城市,落手落腳介紹迪士尼最新嘅主題園區。

Samuel勤力之餘仲好風趣,大爆自己唔識睇中文,講笑話只有小學五年班程度,叫大家唔好笑佢呀。原來Samuel大學同中學都喺美國讀書,屋企人講客家話多過廣東話,所以連埋英文同普通話,佢識得4種語言,分分鐘勁過唔少香港人。

其實Samuel唔講,一啲都唔察覺佢唔識中文,因為廣東話講得幾流利,究竟佢係點樣自學呢?佢話有時睇中文餐牌估估下就識,平時揸車就一定扭開收音機聽下新聞;喺公事上,佢更大讚同事平時都好細心幫佢繙譯。所以由舊年10月喺美國迪士尼調返香港,Samuel已經進步神速,仲教識埋一對15歲同13歲喺國際學校讀緊書嘅仔女,講簡單中文同搭港鐵周圍玩,對佢哋嚟講已一啲難度都無。

撰文: 黛安 消息特靈八卦公關
欄名: 八卦名利場