李慧詩變迪士尼公主 問唐老鴨攞簽名

上月在巴西里約奧運中，發揮堅毅不屈精神的「牛下女車神」李慧詩（Sarah），拼博過後已經返港休息。同公關姊妹傾開，原來Sarah上星期五、六去咗香港迪士尼樂園玩，仲戴上閃令令嘅皇冠，化身成為單車小公主𠻹呀！

四處「集郵」玩足兩日

今次係Sarah第三次去迪士尼玩，上一次係2012年在倫敦奧運贏得銅牌後回港，雖然第三次舊地重遊，但充滿童真嘅Sarah仲好興奮，周圍同迪士尼老友記見面同合照。最令Sarah開心到跳起嘅係，上次去樂園同佢最鍾意嘅唐老鴨緣慳一面，今次終於如願以償啦，成功「集郵」之餘，仲做埋小fans，問唐老鴨拎簽名，真係好似走咗入童話世界一樣，感覺奇妙又夢幻呀。

拎完簽名，梗係要玩盡迪士尼最新、最正嘅遊樂設施，Sarah玩咗「小飛象旋轉世界」、「小小世界」，欣賞埋迪士尼上年10周年時，全新推出嘅「迪士尼魔法書房」音樂劇，仲有點少得今年6月最新開嘅「星球大戰」主題體驗，玩足兩日令Sarah對迪士尼所有吸引嘅設施嘆為觀止，好開心歡度兩日一夜嘅周末。