Le Creuset酒店開倉 三折起搶煲！

鍾愛法國廚具品牌Le Creuset（LC）的姊妹們注意！一年兩度的LC開倉大特賣，後日（14日）開始啦！同公關朋友傾開，開倉一連7日於香港逸東酒店2樓翡翠廳舉行，據過往經驗，每次都吸引唔少女士通宵排隊掃貨，所以朋友提醒姊妹們，必須持有邀請卡先可以同一名朋友登記入場，每節購買時間為1小時，同色同款嘅產品只可購買三件。

LC之所以令大家趨之若鶩，除咗因為姊妹們鍾意佢夠多彩、多款外，仲話LC嘅鍋、鑊、碗碟都出名好用，煮嘢食特別好味，令一眾「十指不沾陽春水」嘅女士都甘願為佢破戒。講番今次開倉，所有產品最低三折起發售，其中南瓜形鑄鐵鍋原價4,278蚊、橢圓形煎鍋則要2,188蚊，折後大約幾百蚊到千幾蚊不等，姊妹們要衝量下係咪可以負擔呀。雖然話女士至愛，但男士都可考慮下買個氹另一半！