鄭中基預告農曆年再踏紅館 樂迷嗌搶飛

鄭中基（Ronald）前晚於澳門舉行世界巡迴個唱首站，並宣布明年農曆年將再度進軍紅館，勢掀撲飛潮。Ronald指今次回歸如同衣錦還鄉，不少樂迷高喊最期待畫面出現了；有人卻批評他只顧拍戲，重踏舞台冇意思！

轉戰影圈十多年的Ronald，今年六月宣布在澳門開騷，這是他相隔十年再開個唱，全城粉絲爭住撲飛。前晚，其個唱正式在金光綜藝館開鑼，圈中好友張達明、梁思浩亦有捧場。擁有一把靚聲的Ronald大唱《想愛你》、《我代你哭》等經典情歌，令現場樂迷「那些年」的回憶返晒嚟。此外，Ronald邀請了顏卓靈、梁漢文等擔任表演嘉賓，又與老父鄭東漢Jam歌演繹《浪子心聲》，絕對沒有「揸流攤」。

自嘲搶贏「左麟右李」

另一方面，已榮升父親的Ronald特地在台上向太太余思敏作出「愛的呼喚」，感激對方為他誕下一對子女Evan及Emma，五歲大女更上台獻花，為Ronald帶來驚喜。到了安歌部分，Ronald終向觀眾報喜：「可能感動到個天，一直以嚟都畀『左麟右李』霸住農曆新年期，今次我終於得到，好似衣錦還鄉嘅藝人要做完澳門先返香港！」

事後Ronald預告明年的紅館個唱將在年初一開鑼，最少開兩場，戲言可以與觀眾齊齊睇煙花。事實上，由於不少樂迷在今次澳門騷撲空，約定與Ronald明年紅館見；有人卻指他早已放棄音樂，應專心拍戲。

協力：Jenni

撰文：Steven、Pat

編輯：黃寶恩

插圖：何樂

設計：梁政敏