梳乎蛋八達通 嘟得好「梳乎」

八達通近年不時推出有八達通功能嘅卡通版配飾，吼中Sanrio卡通人氣，今次一於推出梳乎蛋（Gudetama）八達通配飾，粉絲又要搶購啦！

梳乎蛋八達通配飾分無力版同懶懶版兩個款式，展現梳乎蛋慵懶個性，望到都覺得啱晒「梳乎」配飾仲有彈弓匙扣，等大家可以扣係唔同物品，隨時隨地輕鬆梳乎「嘟」。據講呢款配飾下星期四（4月14日）起，在全綫OK便利店公開發售，每款售價108蚊，留意每款都無按金同儲值額㗎。

同其他八達通產品一樣，梳乎蛋八達通可以乘公共交通工具同shopping，仲可以透過有NFC（近場通訊）技術的流動裝置，喺八達通App，查閱最近40次交易紀錄同網上付款。

大家仲可以申請「八達通自動增值服務」或登記成為「八達通日日賞」會員賺埋日日賞。