黛安
黛安

中大醫學院35周年院慶 星光熠熠 齊回味「那些年」

發佈時間: 2016/10/03

中大醫學院35周年院慶 星光熠熠 齊回味「那些年」

醫者父母心,黛安一向都好敬佩醫生嘅仁心仁術,上星期有幸出席中大醫學院35周年Gala dinner,有1,800位師生、政府官員、醫管局高層、政商界名人同埋唔少本地同外國大學代表出席,筵開超過140席,場面好盛大!唔少醫學院舊生更同家人以及「醫學院第二代」赴會,大會仲精心蒐集歷年舊照,等舊生回味「那些年我在醫學院的日子」。

本身係國際腸胃研究權威的中大校長「祖堯BB」沈祖堯仲響應大會嘅手機自拍環節,即場同主持方健儀selfie。

沈祖堯又同大家分享醫學院由1981年第一屆60人醫科生,發展至今成為全球頂尖學院,一項又一項醫學技術和科研突破,同埋當日與全港醫療人員一齊對抗沙士嘅時期,令在場賓客聽到好動容。

當晚慈善拍賣環節嘅作品,仲係由中大醫學院外科學系教授、助理院長趙偉仁教授畫嘅花鳥國畫,配上沈祖堯校長題詞「上醫醫國,中醫醫人,下醫醫病」,勉勵醫科生除關心病人健康外,仲要放眼國家社會。最後由李俊駒慈善基金主席李俊駒以36萬投得,收益全數用於「蔡永業紀念基金」,推動醫學院醫療教育及學生發展。

撰文: 黛安 消息特靈八卦公關
欄名: 八卦名利場