Tesla Model X金鐘登場 名人朝聖試玩

車迷期待已久的Tesla Model X終於在港現身，未來3個禮拜仲會喺太古廣場展出，噚日唔少粉絲已大排長龍，一睹Model X風采，場面墟冚。

Tesla亞太區副總裁任宇翔仲話，亞洲電動車市場發展得好快，香港係其中一個領先市場，據統計香港Tesla車主總駕駛里程已達7,300萬公里，已慳咗超過700萬公升的汽油排放，真係夠晒環保。

噚日新車登場，已吸引大批傳媒採訪。唔少名人亦到場朝聖，黛安除咗見到趙世曾嘅公子趙式浩，著名大律師周啟邦囝囝周國豐亦有坐到車上試玩。向公關姊妹八卦，唔少嘉賓試過架車之後都好感興趣、想買番架嚟玩咁話！

時速最高250公里

查實Tesla早喺舊年10月，已宣布推出新SUV車型Model X，而喺香港發售的版本包括60D、75D、90D及P90D。今次展出嘅左軚7座位車型，車迷可試坐兼近距離接觸。

黛安當然都落手摸過，架車唔單止靚仔，仲設有被譽為「生化武器防護模式」的空氣淨化系統，真係目不暇給。聽聞Model X由零加速至時速100公里，最快只需3.1秒，最高時速達250公里，真係要先練下手車去駕馭啦。