兒子曉風不乏女伴 阿倫唔心急做老爺

上個月過檔英皇的李克勤，昨日因與「校長」譚詠麟合資的餐廳「左麟右李」喬遷，二人再度合體出席開幕儀式。談到校長囝囝曉風被指身邊有不少狂蜂浪蝶，校長就寄語還是睇定啲先好。

校長譚詠麟與李克勤昨午於銅鑼灣舉行餐廳喬遷儀式。自克勤過檔英皇後，兩人首次在公開場合碰頭，校長說：「生意keep住有見嘅，雖然佢去『海外進修』，但學成會返來。」克勤亦重申生意跟唱片公司無關，也不會抽佣，他笑言：「屋企兩個（仔）先係老闆。」

租金貴難搵舖

談到開分店，他們都說會構思，只是香港租金貴，要物色位置佳、租金合理的舖位也非易事，記者說阿倫手上應有不少舖位，他笑說：「要啱先得，寫字樓嗰啲冇用。（你嗰啲全部一棟棟啦！）我唔敢答你，哈哈。」

談到最近有傳劉德華再度榮升爸爸，太太朱麗倩在外地產子，校長笑謂：「如果係都好高興喎！可以考慮嚟呢度擺滿月酒呀。」身旁的克勤就表示早前出席華仔的生日會，整晚風平浪靜，沒有人問也沒有人講，倘若是真的都替他開心。阿倫又抵死表示：「華仔賺埋咁多，要承托力先得。」

不捨兒子出外留學

提到兩人的下一代都未畢業，未能幫手打理生意，兩個仔還細的克勤即苦笑謂：「我仲遠啦。」克勤也說即使送兩個仔出國都不會太早，始終不捨得，阿倫似是有感而發：「會唔捨得嘅。」校長的兒子譚曉風正在英國讀大學，曉風長得高大英俊，身邊很多女仔，校長豈不是很快做老爺？校長即謂：「啋！唔使咁早，見識多啲先啦，成個森林都係。」

採訪：Pauline

攝影：林良明

編輯：林梓添

設計：梁政敏