【聲明】港生活網站並無進行電話推廣活動

廖碧兒 琦琦 撐乳健籌款 化身Pink ladies支持

發佈時間: 2016/10/11

終於有秋天感覺喇,唔少朋友都去行山,黛安都唔例外,噚日去咗山頂出席香港乳癌基金會步行籌款活動「乳健同行」,同主席霍何綺華(Eliza)傾開先知,原來活動今年已踏入第12年,有2,000人參加。Eliza話,上星期香港受熱帶風暴「艾利」影響,好擔心影響活動舉行,加上一號風球掛咗55小時,所以佢一早有心理準備活動要喺風雨下舉行,誰知天公造美,陽光普照,佢又讚揚參加者充滿正能量,成功趕走雨神!

康復者齊出力

活動雖然一大清早開始,但吸引唔少熱心人士到場支持,包括特首夫人、香港乳癌基金會名譽贊助人梁唐青儀、醫管局主席梁智仁。另外多位香港乳癌基金會大使陳寶珠、薛家燕、廖碧兒、琦琦等,場面熱鬧。

Eliza靜雞雞同黛安講,今年佢好開心,好多朋友都不遺餘力幫手籌款,包括基金會負責支援完成所有治療的康復者小組「太陽花」,籌得27萬蚊,獲頒團體最高籌款獎,以及基金會理事會成員陳姚慧兒積極向百多名朋友籌得9萬蚊,成為個人最高籌款得獎者,認真抵讚同值得學習呀!

撰文: 黛安 消息特靈八卦公關
欄名: 八卦名利場