文華打造「甜品花園」 $688食蛋糕飲香檳

旅發局美酒佳餚巡禮今個月底喺中環新海濱舉行，黛安密切期待，因為文華東方酒店會喺29日喺場內嘅「品味館」有一連兩場甜品下午茶，仲打造成為一個「甜品花園」，每人$688就可食到超過15款甜品同鹹點，可以喺咁靚嘅環境享受香檳，啱晒一眾姊妹，現在正接受預訂。

文華酒店糕餅行政總廚Yves Matthey話，佢假日都鍾意到郊野踏青，因而有感而發設計出「甜品花園」，將甜品布置成花園盤景，木頭、雀仔、樹葉……眼見嘅幾乎都可食落肚，但咁靚，真係有少少唔捨得食。

佳釀曾於《占士邦》出現

甜品除咗文華經典嘅1963芝士蛋糕、英式鬆餅配特調玫瑰果醬外，仲有首次登場嘅薯仔形tiramisu、橙味朱古力旋轉、番茄形忌廉芝士波等。減肥？食完先算吧！

兩種任飲嘅法國香檳包括曾經喺占士邦電影出現的Bollinger Special Cuvée NV及Moët & Chandon Impérial。噚日我仲喺現場遇見識飲識食嘅《Wine Luxe》CEO蕭乃新，以及捷成飲料營業主管陳俊啟，佢哋話呢兩支酒清新解膩，配甜品一流，仲叫黛安到時一要去試試。