【聲明】港生活網站並無進行電話推廣活動

太古白德利頻飛Miami 麥奇連本周退休

發佈時間: 2016/10/13

諗起Miami(邁阿密),真係好想奔向當地嘅陽光與海灘。點解黛安無端端講起Miami?之唔係因為太古地產CEO白德利噚晚多次提起囉。

項目媲美太古廣場

事緣噚晚黛安去咗白德利所舉辦嘅酒會,佢講起集團位處邁阿密市中心的Brickell City Centre商住同酒店新項目,下月正式開幕,為咗慶祝呢件盛事,佢請太古Mr & Mrs Fox餐廳特別沖調一杯有Miami特色嘅雞尾酒「East meets west」,帶大家用味覺去一趟Miami旅行,認真有心思。

聽白德利講,該個Miami項目嘅規模,拍得住香港嘅太古廣場,但會採用天然採光和通風,務求與當地環境融為一體咁話。

佢近排頻頻飛去當地開會,最近一次係3個星期前,仲乘機去埋附近海邊同農墟,以及City Centre嘅酒吧Sugar感受歡樂氣氛。可以經常去咁靚嘅地方出差,真係令人羨慕呀。

噚日酒會上,黛安仲遇到前港督彭定康文膽、太古地產公共事務顧問麥奇連(Kerry McGlynn),原來佢做埋今個星期就退休啦!月底會返澳洲同家人聚天倫,年尾可齊齊歡渡聖誕。雖然麥奇連話無特別搞farewell party,但佢未來幾星期都好忙,因為佢啲老友要趁佢返老家之前搵佢食飯呀,證明佢人緣幾好呢。

撰文: 黛安 消息特靈八卦公關
欄名: 八卦名利場