救心96小時

發佈時間: 2016/10/14

解救過猶太人地球人宇宙公民嘅里安尼遜,喺《救參96小時》入面,智勇雙全,施展渾身解數,救番寶貝女。而我今次「救心96小時」,有好多可一不可再嘅幸運成分,雖然我無信仰,冥冥中好似有主宰。

試問如果:

病發早啲,食早餐無耐,手術唔做得,等一等,死梗。

病發遲啲,按計劃去健身房跑步舉重,跑一跑,死梗。

老婆唔喺身邊,無人當機立斷去醫院,拖一拖,死梗。

醫院門診唔係無乜病人,可以即做心電圖檢查,拖兩拖,死梗。

老婆喺緊張關頭搵唔到同學,肯定去咗公院,重新分流輪候,重新化驗檢查,心臟科醫生未必駐院,手術室未必空檔,等兩等,死梗。

同學短時間內,搵唔到兩位專家,等兩等,死梗。

唔係自小運動,底子厚,心臟血管5%流量,都支持咁耐,死梗。

無經濟能力,無買醫療保險,點敢住私家,用最好支架,留喺ICU觀察,左算右算,死梗。

四日96個鐘,啱啱遇着剛剛,有險無驚,但唔係個個好似我咁好運。與其等運,不如坐言起行,唔使戒乜戒物,但可以少甜少鹽少油,少肉少煙少酒,多菜多行多跑。有人可能話,咁寡,做人有乜意思,咁就要睇你追求乜啦。我追求快樂,物質又點可能畀到真正快樂,就算我快樂,老婆同埋家人因我而唔快樂,人生根本無意義。

「無我嘅批准,唔可以瓜。」「知道。」

「未還晒欠我嘅,唔瓜得。」「知道。」

「你愛我,唔准早瓜過我。」「知道。」

(編按:莊偉忠先生事忙,亦要保養身體,故專欄將暫別讀者。多謝莊偉忠先生對本報的愛護,亦多謝讀者對本欄的支持,後會有期。)

撰文: 莊偉忠 崇尚反璞歸真的營商信念,以人為本的CEO
欄名: 有種CEO叫做莊