膠紙貼出名畫 太古城有得睇

你又貼，我又貼！紙膠帶圖案可愛又夠品味，係扮文青同展現少女風的不二之選，當然深受香港女士追捧。原來過去4年，單係誠品已經賣出成28萬卷！咁威，梗係要賀一賀佢，所以即日起太古城中心會同誠品合作舉辦紙膠帶博覽會，港、台、日、韓共派出12個紙膠帶品牌首次嚟香港參展，仲有成1,300款紙膠帶畀人慢慢揀，真係花多眼亂。

展覽亦唔止睇咁簡單，仲有得畀姐妹們落手落腳體驗一下，大會特登安排咗超過40場DIY體驗場次，教埋點用紙膠帶整萬聖節面具，又邀請多個紙膠帶品牌布置概念屋，畀大家偷師之餘，現場仲有扭蛋畀你抽限量版紙膠帶！仲等？11月13日就完展㗎啦。