【聲明】港生活網站並無進行電話推廣活動

禤國全新舖扮韓式Cafe 搵Oppa宋仲基迎賓

發佈時間: 2016/10/20

香港人除咗鍾意煲韓劇、聽K-Pop、化韓粧,仲鍾意去韓國玩,做泡菜仔女!東瀛遊執行董事禤國全亦大吹韓風,噚日喺沙田開分店,店面設計成韓國Cafe格局,以潮店必備的霓虹燈招牌做布置之餘,仲搵咗靚仔oppa宋仲基......個紙板企喺門口迎賓,希望粉絲望多兩眼,吸納生意,禤老闆真識做生意。

幫襯新店 享$100折扣

難得新店開張,問禤老闆有無Jetso益街坊啦,佢果然無令大家失望,話只要今月內去新分行報團或買自由行套票,每人可獲$100折扣及護膚品旅遊套票。如果大家都諗住去旅行,不妨行多兩步去新舖幫襯啦。

噚日佢仲由點解開韓國專門店,講到韓國團嘅前景,憶述10年前每年平均只有約20萬港人去韓國玩,近年遊韓人次急2升兩倍,預計今年有60萬人去當地玩咁話。難怪夏天嗰陣,佢搵咗前主播方健儀仲去勻韓國拍旅遊特輯啦。

身為代言人嘅方健儀噚日都有去開幕禮,提到自己去咗咁多地方拍攝,最鍾意釜山甘川洞文化村,覺得條村嘅七彩屋仔好靚,仲話如果同老公去實會狂影相喎。

撰文: 黛安 消息特靈八卦公關
欄名: 八卦名利場