香港商場勁揪 揚威亞太盛事

香港商場每年都使出五花八門嘅招數，搞展覽又引入名店，希望吸引人流又可以建立形象。其實商場界都有好似奧斯卡咁嘅年度頒獎盛事。最近黛安就收到風，剛剛喺菲律賓馬尼拉舉行嘅國際購物中心協會（ICSC）亞太購物中心大獎，香港有幾個商場脫穎而出，拎到最高嘅金獎，真係可喜可賀。

當中成績最彪炳嘅非海港城莫屬，商場憑舊年主辦嘅Swimming by the Harbour同埋Where's Wally兩個展覽，分別喺「公關和活動」及「營銷及吸引客流」兩組奪金，係亞太區唯一拎到兩個金獎嘅商場，認真威威！九倉靚女執董凌緣庭早前仲親自飛去當地拎獎𠻹！不過佢話攞咗獎心情更加緊張，因為海港城下一步需與世界各地金獎得主，競逐全球最高榮譽大獎。希望遲下會再收到佢哋嘅好消息啦！

恒隆 新地 各奪1金

此外，黛安仲要恭喜新地同恒隆，事關新地憑住MOKO商場大翻新喺「翻新/擴展」組贏得金獎；恒隆則以Fashion Walk嘅Fashion Intelligence Index（時尚指數），喺「廣告」組別捧走金獎。

黛安記得，恒隆之前已憑住呢個項目，喺康城Cannes Lions及「廣告界格蘭披治」金帆廣告頒獎禮橫掃多個大獎，難怪恒隆地產租務及物業管理高級經理羅欣淇（Katherine）話好開心，多謝國際評審嘅肯定啦。