花旗7000呎員工健身室 盧韋柏帶隊做Gym 練老鼠仔

花旗集團上個月新辦公樓「花旗大樓」揭幕，樓高21層的新大樓外觀夠晒靚仔，仲已獲WELL建築標準銀級預認證，要成為觀塘核心商業區的新地標完全無難度。最正嘅係除咗辦公地方寬敞，工作椅符合人體工程學設計，大樓仲有個7,000呎健身室畀員工用，會請專人嚟教瑜伽同普拉提，旗下3,200名員工返工都返得健康過人。

本身都係運動健將的花旗集團香港及澳門區行長盧韋柏（Weber），噚日仲帶埋班同事落去做Gym，除咗試玩單車機，仲有舉下啞鈴、練下老鼠仔𠻹呀。佢仲話整個健身室目的係想員工做多啲運動，活得健康啲，因為投資員工嘅身心健康好重要。咁又係，Weber細細個已打開乒乓波，又曾經係英皇書院手球隊猛將，依家仲有keep住打golf，自然明白日日運動身體好的重要性啦﹗

$350全月任用

講番間健身室，原來分咗帶氧運動、阻力訓練同活動訓練三大區域，跑步機、划艇機、單車、Cypex SPARC同爬梯機都一應俱全。之前健身室試運一星期，好受同事歡迎，嚟緊花旗員工只要每個月畀$350，就可以喺星期一至五朝早7點到夜晚9點嚟keep fit了。